Þriðjudaginn 8. maí sl. kom stjórn Fornleifaskóla barnanna (Baldur Daníelsson, Pétur Ingólfsson og Unnsteinn Ingason) færandi hendi í Litlulaugaskóla. Eins og fram kemur á heimasíðu Fornleifaskólans þá fýsir menn þar á bæ að vita meira um veðrið. Nemendum Litlulaugaskóla var því afhend sjálfvirk veðurathugunarstöð með þeim óskum að þeir héldu utan um gagnasöfnun stöðvarinnar og önnuðust úrvinnslu úr upplýsingunum. Eins mun upplýsingum úr stöðinni verða miðlað á netið í gegnum tölvubúnað Litlulaugaskóla.

Af þessu sama tilefni bauð Fornleifaskóli barnanna Einari Sveinbjörnssyni, veðurfræðing,  í heimsókn og uppfræddi hann nemendur og kennara Litlulaugaskóla um ýmislegt er tengist veðri og veðurmælingum. Þá var hann nemendum innan handar þegar kom að staðarvali fyrir stöðina en ætlunin er að nemendur ljúki við að setja upp stöðina og tengja hana fyrir sumarfrí. Næsta vetur munu nemendur svo fylgjast með virkni veðurstöðvarinnar og taka saman ýmsa tölfræði úr þeim gögnum sem stöðin safnar. Á teikningu Alla í Fellshlíð má sjá spauglega hlið á því þegar verið er að setja stöðina upp en fleiri ljósmyndir Unnsteins frá heimsókn Einars og afhendingu stöðvarinnar má finna í Ljósmyndasafninu.